عشان انت مصرى

عشان انت مصرى

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

منقول للحسره

سلامات يا حكومه

وعمالين نتكلم عن التنميه وتوشكى والصعيد والاستثمار والسياحه
واحنا اساسا والحمد لله محلتناش حتى ماية الشرب اتفرج وشوف
ثورة العطش فى مصر عامله ازاى

يا سيادة الريس انا بندايك يا عمنا كلنا انت فين من اللى بيحصل ده ؟

انا عارف ان حضرتك ملكش ذنب وان المسئولين هم اللى مسئولين عن التقصير اللى حصل بس هى يعنى احنا لازم نعمل ثوره علشان تحسوا بينا ولا ايه ؟

طب لو الموضوع كده دا احنا كده مش هنعمل ثوره بس دا احنا ممكن نعلن الحرب كمان اه والله نعلن الحرب بس هنعلنا على مين ؟ اكيد على نفسنا ؟ مااحنا اللى بنفضل ساكتين ومكتومين وراضيين بالامر الواقع لحد اما نتلدع ونحس اننا خلاص بقى كفايه يعنى خلاص غلبنا بقى ارحمونا حسوا بينا هو ايه مفيش دم خالص لو مؤاخذه طبعا يا ريس انا مش اقصد جنابك انا اقصد المسئولين المقصرين

المصيبه السوده ان جميع مراكز الابحاث المتخصصه فى دراية الموارد المائيه فى مصر وفى العالم اثبتت بالادله ان عصر الجفاف جاى جاى وان الميه هتقل اوى لدرجة ان نصيب الفرد هيوصل تلت ساعه تحت الدش فى سنة 2020 يعنى لسه بدرى على الكارثه دى ما تحصل

يعنى المفروض اننا ناخد بالنا بقى ونعمل خطط تنميه واستراتيجيات توفر لنا المياه خصوصا وان عندنا منصادر الميه محدوده جدا

وبتعتمد اعتماد كلى على مياه النيل

النيل اللى رقبته فى ايد 8 دول اسرائيل عماله تولع فيهم من تحت لتحت علشان يقعوا فى بعض كلهم ويضربوا كرسى فى الكلوب و ياخدوا من حصة فى مية النيل يعنى المفلاوض من باب اولى نهتم ونشغل بالنا بالمؤامرات اللى بتحصل دى خصوصا وان العالم على مشارف انه يدخل فى حرب اسمها حرب المياه مش نبص نلاقى دلوتنا من جواها مخلخله وفيها عجز غير عادى فى البنيه التحتيه ومية النيل مش واصله لدلتاه

ولا يا سلام بقى لما الحكومه تهز طولها وتتكرم وتتدخل تحل مشكله من نفسها من غير تدخل سيادتكم تنيل الدنيا

واقرب مثال على ده لما تتعمل محطة رفع الميه للرى من مصرف ميه يعنى المصرف اللى بيتم فيه تصريف المياه الزائده من الارض الزراعيه بعد تروية المحاصيل بيعاد الرى بيها تانى

وده معناه انه الارض تقل خصوبتها وتزيد ملوحتها وتقل كفائتها وطبعا تنتشر الامراض بكل انوعها عن طريق المحاصيل اللى هتطلع دا لو طلعت

يعنى ضرر من كل الجوانب

طيب والنبى ياريس ليا سؤال عند حضرتكم

ليه نعمل مشاريع فى الصحراء ونصلحها واحنا اساسا بنضر فى الارض المستصلحه جاهز

يعنى ليه مش نهتم بالارض الجاهزه اكتر

اهى ارض خام ومايتها لو اهتميتوا بيها شويتين هتوصلها ولا هى مشاريع والسلام

كنت سامع حد طالع على قنوات المريخ ( القناه الاولى والتانيه المصريه )ا

بيقول بطلوا بقى تبصول لنص الكوبايه الفاضى ، وبصوا لمصر اللى مليانه خير وعايشه فىسلام وامان واحمدوا ربنا واشكروه على النعمه اللى انتم فيها

احب اقل لحضرته اننا الحمد لله حامدين ربنا وشاكرين فضله من قبل ما نشوف خلقتك واحب اقول لسعادتك انى للاسف دورت على نص الكوبايه اللى انت بتقول عليه لكن للاسف ملقيتهوش

لقيته فاضى

يعنى نظبببببببببببببف

واخد بالك انت

نظيف

افتكر ان الحكومه اللى مش تقدر تحل مشاكلها الا بتدخل الرئيس تبقى غير صالحة وغير جديرة بالثقه

يارب اللهم انا لا نسالك رد القضاء ولكن نسالك اللطف فيه

وفاز اسود الرافدين

بعدت فتره كبيره اوى عن التدوين لان بصراحه بدات احس انه مفيش فايده عاملين بنتكلم ونقول ونصرخ ومفيش جديد بالعكس الصوره بتسود اكتر واكتر ومش عارفين هتفضل كده لحد امتى بس اكيد اكيد فى حل
وافتكر ان فوزر اسود الرافدين ده اول الطريق لان ده الموضوع الوحيد اللى حركنى وهزنى من جوايا
فوز العراق مكانش حاجه بسيطه او خبر عادى بالعكس تمام فانا مثلا مش بهتم باخبار الرياضه على عكس كتير من الناس لكن اللقاء النهائى بين السعوديه والعراق شدنى اوى لانى استغربت انه من وسط كل الجروح دى والمعارك والحروب انه ممكن يوصل فريق للمكانه دى وفى بطولة زى دى مش سهله وصعبه جدا



مش هنكر انى فى البدايه كنت فاكر ان الفرق بتتساهل مع فريق العراق من منطلق ات شعبه جريح وانهم هيهدوله البطوله لكن لا لقيت فعلا اسود اسود بمعنى الكلمه اسود هدفهم الفوز واثبات انهم اجدر الناس بالفوز بالبطوله وانهم رغم الحروب والحصار والدمار والخراب الا ان الحضاره حضارة بلاد الرافدين مستمره طالما ان الرافدين لسه فيهم الحياه
هم دول العراقيين
ولما عملوها الوحوش وفازوا كانت الفرحه فوق الوصف كانه حلم مستحيل واتحقق وباكمل صوره كل جزء منى تربى فى العراق كان يبكى فرحا وكل جزء منى مصرى وعربى يطير فرحا والدموع اخذت تنساب من عيون والدى فلقد عشنا اجمل واسعد ايام حياتنا هناك على ارض العراق الحبيب
لقد ولدت هناك فى ارض العراق الحبيب فى بلدة تكريت عرين الاسد رحمه الله
على الرغم من ان سنى كان صغير وكنت لسه فى بداي ايام طفولتى لكن من جمال وروعة الايام اللى عشناها هناك لسه فاكرها بتفاصيلها الصغيره لحد دلوقتى
العراق بطبيعتها بحرارتها بتلوجها بجبالها باابارها بخيرها كله كله فاكره وبرحلاتنا للكل بلاد العراق خصوصا على شواطىء دجله والفرات
تحية لكم ايها الاسود واعلموا ان النصر قاد فهذا شعاع امل ينبثق من ظلام الحرب فكما جمعت الساحره المستديره كافة الطوائف حولها سيهب بطل من بين ثرى ارضك يوحد الصفوف والى ان يظهر هذا البطل دعونا نزرع نبته صالحه داخل ابنائنا حيث نزرع داخلهم الحب والخير والسلام والنضال والاخلاص



ملحوظه
انا لا اقلل ابدا من اى فريق عربى وخاصة فريق السعوديه ولكن انا اعتبر ان فوز العراق فوز لنا ككل فوز لنا العرب

عميد آداب فى النيابه

عميد آداب فى النيابه

جامعة المنيا

كتب - هشام أمين

بدأت نيابة بندر المنيا التحقيق في قضية الدكتور أحمد الجزار- عميد كلية الآداب جامعة المنيا- ومحمد محمد الدهشان- مدير شئون الطلاب بالكلية-، المتهمَيْن بتزوير إخطارات استدعاءات الطلاب أثناء التحقيق الذي كان من المفترض مثول الطلاب أمامه، وقد أرسل أحمد غانم- رئيس نيابة بندر المنيا- لكلٍّ من عميد الكلية ومدير شئون الطلاب لسماع أقوالهما، بعد أن استمع مساء أمس الأربعاء إلى أقوال ستة من طلاب الكلية كانوا قد تقدموا بشكوى إلى النيابة يتهمون فيها الجزار والدهشان بالتزوير.



وترجع القصة عندما أحال عميد كلية الآداب ستةَ طلابٍ إلى التحقيقات رقم 223 و245 لسنة 2006م بتهمة إقامة معرض للكتاب وبيع بعض الشرائط الدينية والملابس والأجندات السنوية والبخور- كما جاء بمحضر التحقيق- تحت مُسمَّى الاتحاد الحر أيام الأحد والإثنين الموافق 3 و4/12/2006م، ولكن لم يمثل الطلاب أمام التحقيق لعدم إخطارهم بما يفيد إحالتهم إلى التحقيق ففوجئوا يوم 14/3/2007م بالقرارَين رقم 282 و283 الصادرَيْن من د. ماهر جابر محمد أحمد رئيس جامعة المنيا بإحالة الطلاب إلى مجلس تأديب.



وعندما مثل الطلاب أمام مجلس التأديب أخبروا عميد الكلية بأنه لم يتم إحالتهم إلى التحقيق حتى يتم إحالتهم لمجلس تأديب، ولكنهم فوجئوا بإحضار عميد الكلية لإخطارات مُوقَّعة من الطلاب ومن بعض أولياء أمورهم منسوب فيها علمهم بإحالتهم إلى التحقيق وأنه قد تمَّ إخطارهم كتابيًّا بتاريخ 16 و26/12/2006م بالحضور لجلسة التحقيق في الاتهامات المنسوبة إليهم من قبل عميد الكلية، وهو ما نفى الطلاب حدوثه.



وقد أكد علي حسن البنا- محامي الطلاب- أن الطلاب استطاعوا الحصولَ من مكاتب البريد التابعين لها على شهاداتٍ تُفيد بعدم وجود ثمة إخطارات لهم أو لأولياء أمورهم في الفترة من 1/12/2006م إلى 31/12/2006م سواء من جامعة المنيا أو غيرها.



وبناءً على ذلك تقدَّمنا بطلبٍ لعميد الكلية بالتحفظ على تلك الإخطارات التي بحوزته وطلبنا إعادة مجلس التأديب للمرافعة لإثبات التزوير في تلك الإخطارات ولتقديم الشهادات الصادرة من مكاتب البريد إلا أن عميد الكلية لم يستجب وأصدر قرارًا بفصل الطلاب شهرًا بالنسبة للاتهامَيْن الموجهَيْن للطلاب؛ مما ترتب عليه فصل بعض الطلاب لمدة شهرين متتاليين؛ مما يحرمهم من دخول امتحانات نهاية العام.



وهي الإجراءات التي دفعت الطلاب لتقديم شكوى ضد عميد الكلية ومدير شئون الطلاب متهمين إياهما بالتزوير في أوراق رسمية تمثَّلت في إخطاراتٍ مزورةٍ نسبت إلى الطلاب وأولياء أمورهم توقيعهم عليها على خلاف الحقيقة.
إخوان أون لاين - 17/05/2007

تحويل 45 طالب وطالبة بكلية الاداب الى الشئون القانونية

تحويل 45 طالب وطالبة بكلية الاداب الى الشئون القانونية

والسبب قيامهم بمهرجان الانشودة الثالث (يا قدس لاتحزن
فى الوقت الذى ينتظر فيه الطلاب الامتحانات بشوق وترقب ، وفى الوقت الذى يودع فيه الطلاب بعضهم البعض ويشكرون أعضاء هيئة اللتدريس ، حدث ما كان متوقعا من الادارة فسادت حالة من الغضب العارم بين طلاب الكلية السبب ليس لان النتيجة تأخرت ولا لأن الامتحانات أقبلت ولا لارتفاع سعر الكتاب . وان كان كل ذلك يستدعى الغضب ، السبب أخى المواطن الحر لان الكلية تحاول بشتى الطرق اجهاض الحرية ، فلقد قامت الادارة بتحويل 45 طالب وطالبة شئون قانونية بسبب قيامهم بعمل مهرجان الانشودة الثالث بعنوان (يا قدس لا تحزن) مناصرة لقضايا لقضابا الامة وكان هذا مثار دهشة الطلاب فمن بين الطلاب الـــــ45 يوجد 11 طالبا مفصولين شهر من الكلية من
23/4/2007 الى 23/5/2007 فكيف يفصل الطالب وهو مفصول ؟! نظرا لان السيل قد بلغ الزبى ولان البركان قد هاج ولان اول الغيث قطر ثم ينهمر فلقد رفع الطلاب المفصولين دعوى قضائية ضد ادارة الكلية بالقضاء العالى وهم الان فى انتظار ما سيفعله القضاء وهم واثقون فى عدله .
المشكلة ان الادارة تظن انها وبهذه الافعال سيجعلون الطلاب يتمسكون بخقوقهم وبدعوتهم ولسان حالهم يقول
تالله ما الدعوات يهزمها الاذى يوما وفى التاريخ بر يمين
ضع فى يدى اللقيد ألهب أضلعى بالسوط ضع عنقى على السكين
لن تستطيع حصار فكرى ساعة أو نزع ايمانى ونور يقينى
فالنور فى قلبى وقلبى فى يدى ربى وربى ناصرى ومعينى
ولكن ما اثار غضب الطلاب ان ما يحدث مع طلاب كلية الاداب لم يحدث مع أى كلية من كليات جامعة المنيا وان شئت قل - فى جامعات مصر - هذا العام فهل من المعقول ان يتم تحويل 45 طالب دفعة واحدة وقبل ذلك تم تحويل ما لايقل عن 70 طالبا للشئن القانونية 28 طالبا للمجالس التاديبية والمثير للدهشة ان هذه المسرحية يقوم بادوراها وادائها واخراجها للمسرح الدولى ادارة كلية الاداب
واننا نعلمكم بهذا الكلام لايماننا بأنه هناك من يتحرك لخدمة البلاد والعباد ولانه ما زال هناك فى مصر من يطالب بالحرية
ما زال فى ارض الكرامة خالد وابوعبيدة ما زال يغير
وفى النهاية يختم الطلاب كلامهم بذكرهم الدائم (حسبنا الله ونعم الوكيل ) ومرددين حريتنا لن تموت والخبر العجيب هو تحويل الطالبان احمد الزنوني وعبد الله بركات الطالبان بكلية الزراعة وادراجهم في كشوف المحولين من كلية الاداب

موقع جامعة اونلاين

الف مبرووك يا جيمى

الف مبروووووووووك يا جيمى

يا حبيب قلبى

اخياراَ هتتجوز يا اخى

كذا مره تحايل عليك

واقولك اتجوز بقى علشان تستقر وتكون اسره ونحضر فرحك كده

ونفرح بيك وبولادك

وانت تقولى لسه يا برو مجاش الوقت

اكون نفسى الاول وبعد كده اتقدم لااهلها

يا عم تكون نفسك ايه دا انت ابن الريس يا جدع

مهو انا علشان ابن الريس لازم اكون قدوه لشبابنا

ازاى يعنى مش فاهم

اقولك

انا دلوقتى بمثل الشباب فى مصر حاليا بطموحاتهم واهدافهم ( دى الصوره اللى بيرسمها الحزب الحاكم لجمال

ولو اتجوزت وانا عندى 25 سنه ولا حاجه الشباب هتبص لحالها وتتحسر

لكن شوف بقى لما يبقى ابن الريس بيتجوز وهو عنده 44 سنه

يا ابن الايه تصدق عندك حق

كانت تايهه عنى فين دى

طب والشبكه مش شويه عليها 10 الاف

لا ما هى لنفس السبب

لما ابن الريس يجيب شبكه ب 10 الاف بس اكيد ده هيكون فى مصلحة الشباب

علشان لما يجى يتقدم لبنت الحلال ميطلبوش منه شبكه عاليه

وبعدين انت عارف وصل كام

109 جنيه

وانا هجيب منين فلوس بس

هتجيب منين ؟؟؟؟
ايه خلصتوا على فلوس البلد

ولا خلاص شبعتم

هل سيموت الزعيم ؟

هل سيموت الزعيم ؟

السؤال معروفة اجابته مسبقا

ولكن انا اعلم ان الزعيم بشر مثلنا وسوف ياتى اليوم الذى يتوفى فيه هذا اليوم هو فى علم الغيب

لكن تعالوا لنتخيل وضع البلد بعد ان يتوفى الزعيم ماذا سيحدث؟؟؟؟

هل ستنهار الدوله ؟

هل ستحدث حرب طائفيه وقودها عملاء امريكا واسرائيل ؟

هل ستحدث بلبله بسبب اختلاف وتعارض اراء الاحزاب المختلفه ؟

ماهو السيناريو الذى سيحدث لتولى جمال كرسى الحكم ؟

هل ستدخل الدوله فى فترة ظلام تاريخى لا تخرج منه الا بعد ان تمر بالعديد من المأسى ؟

هل ستقبل امريكا او اسرائيل ان تحدث ثوره تطيح بجمال ؟

هل ستدخل امريكا حينها لتعلمنا المعنى الحقيقى للديموقراطيه ؟

اتمنى ان اجد اجبة لتلك الاسائله لانى حقيقة لا اعرف لها اجابة او اننى اتظهار بانى لا اعرف لانى عندما افكر فى تلك الامور اشعر بان الطريق المظلم كما اننى اتوقع ان مصر ستدخل انفاق مظلمه اتمنى ان تخرج منها وان تصل الى بر الامان اتمنى ان اجد الجواب

بكفاياك بقى ياريس

بكفاياك بقى يا ريس

رساله من بقايا شاب مصرى حطمه برنامج حضرتك الانتخابى

سيادة الريس بصفتك فى مكانة والدى وبما اننا فى بلد ديموقراطى احب اتوجه لسيادتك بمنتهى الديمقراطيه اللى موجوده فى بلدنا واتوجه لسيادتك بكلمتين اتمنى يا رب انهم يوصلول لك كلمتين جوايا فضلت مخبيهم لحد اما يجيى الوقت اللى اصرخ فيه واقولهم لكن الوقت ده مش بيجى لحد اما وصلت لمرحلة ان احلمى بتدمر بتتحطم شايف ليا الايام الجايه كلها سواد فى سواد صدقنى يا ريس معتش بنصدق ولا كلمه من اللى بيصرح بيها المسؤلين ولا حتى كلام الجرايد ملينا بقى من الكلام الفاضى اللى من عينه الكادر الخاص هيطبق يا جماعه اطمنوا ولا كله كوم وموضوع ان اقتصاد بلدنا بخير والحمد لله وان مصر دايما فى تقدم والجنيه سعره تماما علشان كده هنخليه فضه كنوع من انواع تنشيط السياحه !! بتضحكوا على مين بس الجنيه بقى فى التراب وفى النازل دايما واقتصادنا زفت اما بالنسبه بقى لمشاريع الشباب والاسكان والاحلام الورديه دى للاسف مهياش ورديه ولا حاجه اى مشروع من مشاريع الشباب من دول بيحتاج اقل حاجه مبلغ وقدره علشان الواحد يقدر انه يخلص فى المراحل اللى انتم محددينها وده غير انه فى مدن جديده اساسا مش فيها اى خدمات ومش تصلح للاستقرار الادامى او حتى الغير الادمى واكبر دليل على كده مدينة المنيا الجديده وده غير ان نظام تصميم المدينه نفسه غلط فى غلط وهيجى يوم وتقعد على اللى قاعدين فيها دا اذا كان هيبقى فيها حد من اساسه ولا مشروع توشكى الفاشل اسمحلى فعلا هو مشروع فاشل تقدر تقولى حضرتك قدم ايه لمصر جديد انا عارف ان حضرتك كنت بتحلم تعمل مشروع زى السد العالى يتحفظ باسم حضرتك فى التاريخ زى السد العالى بالضبط لكن للاسف المشروع ده فشل بكل المقاييس غير ان الارض غير صالحه للزراعه اننا بنضيع كمية ميه كبيره اوى من مية النيل اللى احنا فى عرض شبر منها طيب يا سايدة الريس لما احنا عندنا ميه كتير اوى كده و بنروى بيها الصحرا طيب ما هو من باب اولى نوصل الميه للمكان المزروعه فعلا يعنى مثلا فى محافظات الدلتا لحد الان اراضى مش بتوصلها ميه من اساسه على الرغم من ان الترع موجوده ومتنظمه لكن لاء لازم نعمل مشاريع ونضيع مليارات ولا بلايين علشان نقول احنا عملنا لمصر لكن مش علشان تعمل نقله فعلا فى الاقتصاد نيجى للانتخابات يا ريس والله العظيم مفيش واحد فى الشعب مش عارف ان اى انتخابات بتتزور لدرجة اننا بقينا خبرا عالميين فى المواضيع دى واسالوا بوش وفى حاجه اكتر من ان الشعب كله يطلع فى الشوارع والفيدويهات والفضائيات والدنيا كلها باعلامها تختار مرشح واحد وهو مثلا جمال حشمت والشعب وغيره وفى الاخر نلاقى واحد تانى لا اخترناه ولا هنختاره وبعدين الانتخابات اللى قبلها تحصل سابقه تاريخيه ان الحزب الحاكم يتعاون مع حزب معارض علشان يسقطوا نفس المرشح طب ليه كده يا ريس ايه اللى هيحصل يعنى لو المرشح ده عدى مش احنا بلد ديموقراطى والدنا ماشيه تمام لكن تصدق حضرتك فعلا موضوع الانتخابات ده فعلا بيجى فى مصلحة الشعب على الاقل الواحد بياخد فلوس قصاد مشوار صغير اوى لحد الصندوق ومش فلوس وبس دا ممكن موبايلات اه والله يا ريس فى تسعيره محطوطه للاصوات معنديش فكره بصراحه بقى مين اللى محددها حد من الوزاره وحابب يحسن مستوى الدخل ولا دى اجتهاد من بعض الزملا اما موضوع الاء ده بقى نكته هههههه متاخذنيش يا ريس بس بجد والله نكته غريبه اوى بنوته فى اولى ثانوى كتبت كلمتين كان ممكن المدرس اللى بيصحح عادها بينه وبين ادارة المدرسة وميستحقش الرعب اللى حس بيه كده هو وزمايله المدرسين والمدير والناظر والمدرسه كلها وبعدها الاداره والمديريه والوزارة لحد اما الموضوع يوصل لسيادتك تفتكر يا ريس ان الموضوع كان يستاهل دا كله احنا بقينا للدرجه دى جبنا كده متقولهم يا ريس اننا فى بلد ديموقراطى ليكونوا نسوا ولا حكاية العباره دى كمان مكانوا صحابها بين ايدينا ليه يفتلوا بعملتهم بعد اما التحقيقات كلها اثبتت انهم مقصرين ومهملين وحالتهم بالبلا ولا رؤساء تحرير الجرايد ايه العز اللى كانوا عايشين فيه ده كله مش ممكن مرتبات بالملالايين والمصيبه ان الصحفى الكبير مصطفى بكرى واسطوله الشجاع اثبتوا بالادله النهب اللى كان بيحصل ومش محتاج الموضوع لادله مكان باين عينى عينك كده لكن راح فين الكلام ده ولا حد يعرف اهم عايشين وخلاص ولا الوزير اللى ربنا يسامحه بالاسمده بتاعته الفاسده واللى تم اثبات ده برضه بالادله لكن فين منعرفش ولا غيره وغيره وبعدين حضرتك تيجى تقولنا اننا بلد ديموقراطى وعايش فى سلام وامن اه صحيح بخصوص الامن والسلماو كده يعنى انا فاكر كويس اوى كلمه جميله كنت قولتها سيادتك انا لحد دلوقتى مش عارف افهمها ايام حرب العراق ازاى مش نقدر نتحكم فى قناة السويس والملاحه اللى فيها ؟!! ومش غريبه ان البرادعى اللى هو عربى وخاصة مصرى مصرى مصرى ياخد جايزة نوبل بعد حرب العراق عدل اه صحيح حاجه تانيه هو ليه ايمن نور محبوس لدقوتى والله بجد انا مش عارف السبب واشمعنى عمرو موسى هو اللى يمسك جامعة الدول العربيه ليه واحد عظيم زى الاستاذ هيكل يبقى مجرد مرجع محفوظ فى مكتبتنا نرجعله مع انه لو تولى منصب كويس ممكن مصر كلها تستفاد من خبرته ليه يا ريس لما بينقتل من عندنا اتنين تلاته من ولادنا ولا اخونا ولا حتى قرايبنا على ايد اسرائيلى بتنرفز ونشجب ونندد وحاجات من دى وفى الاخر مش بنطول اى حاجه لكن لو جندى اسرائيلى اتعور بس ولا جتله اوفه ممكن تقوم الحرب العالميه التالته بسببه هو مين اللى عامل سلام مع التانى مصر ولا اسرائيل ؟ هتفرق ؟ اه طبعا هتفرق اوى مش احنا اللى كنا منتصرينيبقى هم اللى لازم يخافوا مننا مش احنا اللى نخاف اسرائيل محتلانا وده واضح اوى والكل عارف كده لكن فى ناس باين مش عارفين او بيتعاملوا بحسن نيه وهم حضرتكم صدقنى يا ريس اسرائيل فى كل مكان فى كل شبر فى كل فكر موجوده ولا امريكا آآآآآآآه يا امريكا تعرف انى بحب كونداليزا اوى اه بحبها بحس انها فتاة احلامى اصلها متمكنه اوى وبترضى جميع الاطراف ومش بتحرم حد من حاجه ابدا بس كله بحسابه توته على كبوته زى ما بيقول عمنا اللمبى تعرف يا ريس ليه بنحب اللمبى بالذات على فكره احنا مش شباب تافه ولا حاجه ولا بايظ كل الموضوع اننا خلااااااااص زهقنا وملينا من قلة الحيله والبهدله والعيشه الضنك اللى عايشين فيها وعمالين نعافر مع الدنيا وبنحاول نعشها لكن مفيش فايده احنا بنحب اللمبى اوى وب نحب نقلده لان دماغه عاليه اوى وبيقدر انه يعزل نفسه عن الدنيا كلها يعنى لو الدنيا بتتهد من حواليه زى ما بيحصل دلوقتى هو ولا علمه ولا حاسس بده كله بالعكس ده بهمه وحزنه بيحوله لضحك وهبل وعبط بس اهو عايش ازاى بقى وفين ومنين مش موضوعنا بس اهو عايش والسلام الواحد مننا لما يوصل لاخر مراحل تعليمه يحس انه كان فى التعليم بيضيع وقت وان صحابه اللى متعلموش عملوا نفسهم وكونوا اسر وبرضه اتعلموا من مدرسة تانيه هى مدرسة الحياه لكن احنا مشكلتنا اننا اتعلمنا فى مدرسة الحكومه والحمد لله كنا فران تجارب ميه ميه كنا بنصحى كل يوم على قرار جديد من الوزير للى ربنا لا يعيد ايامه ولا امن الدوله حبايبنا الحلوين بيفكرونى بجملة اللمبى المشهوره هتلاقيكنى فى كل مكان فى اوضة نومك فى فرشتك فى سريرك فى بنطلونك فعلا والله تخيلوا مثلا كده لما تبقى فى مدينة جامعيه طلبا زى بعض واخوات وفى نفس الكليه وبياكلوا ويشربوا ويضحكوا مع بعض يكتشفوا ان بينهم واحد صاحبهم امن دول بيكتب تقراير عن تفاصيل التفاصيل طيب تخيلوا المفروض اننا هنعيش فى امان تانى ازاى ونتعامل بثقه مع اللى حوالينا ازى لا واكتر من كده لو جيت تدخل المدينه مثلا بجريدة زى الاسبوع او الدستور جردية معارضه يعنى تتمنع وممكن يتسحب كرنيهك مع ان اللى واقف على البوايه ده جاهلا اساسا معرفش ازاى بيعرف انها جرايد معارضه لكن لو دخلت بجريدة صفرا زى النيا مثلا يا سلام دا يرحب بيك اوى وممكن يستلفها منك ولا لما يبقى واحد غلبان زى حالتنا وابوه فلاح ومش معاه اللى يكفى يصرف على ابنه فى السكن الخارجى ويجيى يقدم مدينه مش يقبلوه بحجة انه مفيش امكان فى الوقت اللى فيه اولاد ناس واصلين ساكنين فى المدينه مع انها مش من مقامهم بس اهى حاجه بلاش كده بلاش نستغلها يعنى شعارنا لا للمحسوبيه لا للرومتين لا للرشوه ده شعار اى حكومه او وزاره لكن تعالى معايا يا سيادة الريس نبص كده فى كل مصلحه حكوميه استحاله تخلص شغلتك من غير رشاوى ووسايط استحاله هتقولى مهو ذنب الموظفين والله الموظفين دول اغلب من الغلب وطالع عينيهم و دول على الاقل مش هنزعل لما ندلهم احنا برضانا لكن مش الاغنيا التانيبن فاحشى الغنا اللى بياكلوا من لحمنا الحى وبيسرقونا عينى عينك اما الموظفين الغلابه دول رقبتهم فى ايدينا مش كده برضه ولا ايه وكله كوم وموضوع الدستور ده كوم .. ههههههههههههه اصلى افتكرت مشهد يفطس من الضحك كل القنوات الفضائيه بحالها جايبه لجان الجمهوريه كلها فاضيه مهجوره وفى القناة الاولى والتانيه طالع الوزير يؤكد ان الاقبال على الاستفتاء كان كبير وان الناس عايزه تدلى بصوتها فعلا طب بذمتك مش حاجه تموت من الضحك ههههههههه ولا لما يسالوا واحد من اللى شايلين النعم بيقولوا نعم على ايه على الدستور طيب هو الدستور فيه ايه اتغير الماده مش عارف كام وكام طيب ودول فيهم ايه يبلم ويسكت مهو صحيح ميعرفش هو كل اللى يعرفه انه هياخد فلوس يصرف بيها على عياله مقابل انه هيشيل يافطه ان شاء الله يا رب تكون اليافطه دى بحبك يا اسرائيل اى حاجه بقى مش فارقه مش فيها فلوس خلاص ايه اللى هيمنع يا جماعه احنا مش هنبقى دوله بوليسيه طب ازاى يا جماعه يقعدوا يلفوا بيك يمين وشمال باسلوب سوفسطاى عارفوا وحافظتوا ونفسى اتعلمه من مدرسة الحزب الوطنى لحد اما يقنعوك ان التعديلات دى هى الامل لا ويقولوا لك الغينا الطوارىء وخليناه قانون الارهاب طب والنبى ياريس بالله عليك هى كلمة الارهاب دى اللى هيتطبق على اساسها التعديلات معناها ايه ؟ يعنى انا دلوقتى لو ماشى فى الشارع وارهبت قطة يبقى انا كده يتطبق عليا القانون الارهابى اسف قصدى قانون الارهاب طيب فى حاجه تنايه نفسى افهمها صحيح هو انت يا ريس فى برنامجك الانتخابى والقرارات اللى فيه او المشاريع اللى فيه ليه مثلا حضرتك طول مدة توليك مش عملتها كخطه تمشى عليها يعنى اشمعنى دلوقتى بس اكتشفنا اننا لازم نبنى ونعمر ونوفر فرص عمل طب ما هو ايه الجديد مهو ده حالنا بالعكس يمكن حالتنا بتدحدر مع مرور الوقت على فكره صحيح انا بموت فى جمال ابن حضرتك اصلى بحس انه شاب زينا كده وعايش مشكلاتنا وحاسس بينا اوى بدليل انه بقى فى الاربعين وشويه ومش اتجوز لحد دلوقتى يعنى حتى معاناة الشباب وصلت لولاد الريس يا جدعان يا خبر مش زى بعضه ولا علاقتنا بالعراق وقت حربها وقبل كده ووقت حرب الخليج سبحان الله مش فلوس العراق دى هى اللى بنت نص قول ربع حتى يا اخى بيوت الريف المصرى دى حقيقه مفيش حد يقدر ينكرها لا ولا موضوع حرب لبنان ده غامض اوى نفسى الاقى له تفسير ازاى العرب كلهم وعلى راسهم مصر يسكتوا للحرب دى من بدايتها ومش يقفوا جنب اللبنانيين على ارغم من ان القائد البطل نصر الله قالكم بالمفتشر كده مش عايزين خدماتكم متشكرين اوى بس انتم سيبونا فى حالنا واسكتوا خالص ليه قعدتوا تتفرجوا حاطين ايدكم على خدكم مستنيين اما يخلصوا على حزب الله والمقاومة اللبنانيه لكن الحمد لله ده محصلش انا عارف ان ده خوف ويمكن رعب من الاخوان المسلمين لاحسن يشموا نفسهم فى مصر ولا حاجه خاصة ان حركة فتح كانت فى السلطه اياميها اه صحيح بخصوص الاخوان المسلمين على فكره يا ريس الاخوان المسلمين دول فى دم كل مصرى انا لاخوانى ولا نيله لانى اساسا جاهل ومعرفش ايه اساسا الاحزاب التانيه ولا اعرف حركة كفايه بتقول كفايه لاايه ولا ايه ولا ايه ولا ايه ولا حزب التجمع متجمع على ايه ولا الوفد وافد منين اساسا لكن الحزب الوطنى اكيد عارفه وحافظه صم مش هو اللى بيطلعنا رحلات ببلاش وبيعمل دورات وبيدينا جوايز وبنطلع كرنيهه اللى يعتبر حاجه موثوق فيها اكتر من البطاقه نفسها على فكره احنا مش شباب تافه ولا سطحى ولا الكلام الفاضى ده كله احنا شباب ضايع بس وتايه واحلامى متدمره ومتحطمه ومستقبلنا عارفين انه كده كده اسود ومنيل بنيله ومفيش اى حاجه بتبين لنا انه فى امل اه صحيح كنت هنسى احنا ازاى دوله اشتراكيه نفسها افهم اللعبه دى مش الحكومه عماله تبيع اول باول فى شركاتها او حتى بتدخل شركا معاها بنسبه كبيره علشان يمسكوا هم الاداره يبقى ازاى دوله اشتراكيه ويعنى ايه اساسا اشتراكيه بالنسبه لسيادتكم

على فكره احب اعرف سيادتكم بيا كويس اوى اولا انا مش فئه مندسه ولا حاجه زى ما بتقولوا على اى حد مش عاجبكم انا واحد من الشعب المصرى بشرب من نيله وبتنفس من هواه ومتربى فى طينه وانى مش بثير فتنه ولا نيله كل الموضوع انى بوصل لسيادتك اللى 70 مليون مصرى بيقولوه بس حضرتك مش سامعهم وكل اللى بطلبه من سيادتك اننا نكرر نفس السيناريو اللى حصل مع الخديوى اسماعيل وعائلته المصونه وان يتحكم الشعب فى تحديد مصيره يعنى بكفاياك بقى يا ريس يا رافع راسنا وسط العالم كله يا مشرفنا يا مهننا يا مهشكنا ومبشتكنا

انا عارف انى بعد الكلام اللى كتبته ده هيطلع دين اهلى وان اسمى هيتحذف من على وش الدنيا وانى هدوق العذاب الوان واشكال بس ايه الجديد يعنى مانا بعيش العذاب ده كل يوم

على فكره انا لا عايز شهره ولا بطوله ولا اى حاجه من اساسه احسن انا عارف وحافظ كلام الحزب الوطنى هيقولك دا عايز يشهر ويبقى بطل وكلام فاضى انا مش كده خالص واكبر دليل على كده انى اساسا جاهل والله العظيم جاهل وفاشل ويمكن يكون سبب كلامى ده كله هو سبب فشلى وكمان احب اعتذر لسيادتك باسلوبى الاى كلام فى كلامى بس بصراحه انا قايل لسيادتك من الاول انى بكلم والدى يعنى مش معقوله هكلم والدى باللغه العربيه الفصحه واكيد برضه مش هاخد راحتى فى الكلام اما بالنسبه للاخطاء الاملائيه فبصراحه فى شوية حروف الاستاذ بتاعنا مدهلناش فى المدرسه علشان كان واخد اجازة مرضيه ولسه مصحاش لحد دلوقتى من مرضه يا ريت ندعيله بالشفى كلنا هو من 1982 وهو فى المستشفى بس يا ترى بقى ربنا هيديله الصحه ويكمل فيها علاجه ولا ربنا هيريحه من دنيتنا ولا ايه مش عارفين بس اهم حاجه اننا نتوجه كلنا بالدعاء ليه ان ربنا يهديه ويعقله ويروح يتعالج برضه علشان هناك هيلاقوا رعايه و عنايه احسن من هنا بكتييييييييييييييييييييييييييييييييييرانا عارف انى كده كده هتحبس بس اعمل ايه خلاص فاض بيا

Send From : Pro